Taldeak 23 urtez azpiko proban, elite UCI-elite mailako lasterketan eta banakako erlojupekoan izango du ordezkaritza datozen egunetan.
Smartlog Nest Cycling Team-ek ordezkaritza zabala izango du aste honetan Sabiñanigon (Huesca) jokatuko diren estatuko txapelketetan. Guztira, taldeko zortzi txirrindularik hartuko dute parte hitzorduan: 23 urtez azpiko proban, elite UCI-elite mailako proban eta banakako erlojupekoan, hain zuzen.
23 urtez azpiko kategorian, Jon Conejero, Gabriel Ibañez eta Markel Olabe Euskadiko Selekzioarekin lehiatuko dira larunbateko errepideko proban; Unai Buteau eta Aimar Lacasta, berriz, Nafarroako Selekzioarekin ariko dira. 158 kilometroko ibilbidea izango duen lasterketa 15:30ean abiatuko da. Horrez gain, Lacastak osteguneko banakako erlojupekoan ere parte hartuko du. Proba horrek 31 kilometro izango ditu eta 15:00etan hasiko da.
Bestalde, igandeko elite UCI-elite mailako proban Aitor Agirre, Aimar Erostarbe eta Diego Ruiz de Arcaute izango dira. 211 kilometroko lasterketa 10:00etan hasiko da. Agirrek ere osteguneko banakako erlojupekoa jokatuko du; 31 kilometroko proba, 15:00etan abiatuz.
Horrela, Smartlog Nest-ek denboraldiko hitzordu garrantzitsuenetako bati egingo dio aurre Sabiñanigon, taldeko txirrindularien ordezkaritza zabalarekin.
Lehiatik harago doan proiektua
Sabiñanigon zortzi txirrindulari izateak esanahi berezia du Smartlog Nest-entzat. Izan ere, gurea da pelotoian Euskal Herriko txirrindulariez osatutako euskal talde bakarra. Horregatik, denboraldiko hitzordu garrantzitsuenetako batean hain ordezkaritza zabala izatea egindako lanaren eta bertako talentuaren alde egindako apustuaren isla da.
Baina Smartlog Nest ez da emaitza hutsen inguruan eraikitako proiektua. Gazteak txirrindulari gisa ez ezik, pertsona eta profesional gisa ere hazteko ingurunea eskaintzea du helburu. Horretarako, txirrindularitza hezkuntzarako eta aukerak sortzeko tresna gisa ulertzen du, eta prestakuntza integrala du ardatz, txirrindulariei bizikletatik haragoko etorkizuna eraikitzen laguntzeko.
