Taldeak ezin hobeto amaitu du Nafarroako Itzulian egin duen lehen parte-hartzea: etapa garaipen bat, sailkapen nagusiko zazpigarren postua eta lau etapetan zehar erakutsitako lehiakortasuna izan dira asteko emaitzarik nabarmenenak.
Smartlog Nest Cycling Team taldeak arrakastaz amaitu du Nafarroako Itzulian egin duen lehen parte-hartzea. Elite eta 23 urtez azpiko txirrindularien egutegiko lasterketa garrantzitsuenetako batean, talde gipuzkoarrak lau eguneko lehiari amaiera eman dio garaipen batekin, sailkapen nagusiko zazpigarren postuarekin eta lasterketako une erabakigarrietan protagonismoa erakutsiz.
Ruiz de Arcauteren eguna
Nafarroako Itzulia Hiriberri/Arakil eta Oderitz/Larraun arteko lehen etaparekin abiatu zen. Tenperatura altuek eta etengabeko gorabeherek markatutako jardunaldia izan zen, eta taldeak lasterketaren neurria hartzeko balio izan zuen.
Bigarren etapak, Martzilla eta Ribaforada artekoak, ekarri zuen taldearen lorpenik handiena. Behe Erriberan barrena jokatutako etapa lauan, talde osoak helburu bakarra izan zuen: Diego Ruiz de Arcauteri garaipena lortzea. Estrategiak ezin hobeto funtzionatu zuen, eta azken kilometroetan egindako lan bikainaren ostean, txirrindulari arabarrak taldekideen ahalegina borobildu zuen helmugan besoak altxatuta. Denboraldian zehar erakutsitako konstantziaren eta egindako lanaren saria izan zen garaipena.
Erratzu eta Urdax arteko etapa nagusian ere taldeak aurpegia eman zuen. Aimar Erostarbe eta Markel Olabe garaipena jokoan izan zuen ihesaldian sartu ziren, eta Unax Otegi ere bertan zihoan zulaketa batek atzean utzi zuen arte. Erostarbek azkenaurreko mendatean galdu zuen aurrekoekin kontaktua, baina Olabek amaierara arte eutsi zien aukerei, eta seigarren postua eskuratu zuen. Emaitza horri esker, jauzi garrantzitsua eman zuen sailkapen nagusian.
Lehen parte-hartze ahaztezina
Lasterketa Iruñea eta Allo arteko etaparekin amaitu zen, eta Smartlog Nestek berriro ere protagonismoa izan zuen. Jardunaldiaren azken zatian hamar txirrindulari inguruko ihesaldia osatu zen, tartean Jon Conejero eta Unax Otegi zirela. Taldeak minutu eta berrogei segundo inguruko aldea izan zuen, eta garaipena ihesaldiko txirrindularien artean erabakiko zela zirudien.
Azkenean, amaiera polemiko batek Conejerori garaipena lortzeko aukerak mugatu zizkion, eta bigarren postuarekin konformatu behar izan zuen. Otegik, berriz, bederatzigarren postuan gurutzatu zuen helmuga.
Sailkapen nagusian, Markel Olabek zazpigarren postuan amaitu zuen, eta horrela berretsi zuen itzuli osoan erakutsitako maila bikaina.
Emaitzez harago, Nafarroako Itzuliak agerian utzi du Smartlog Nest-en lehiakortasuna egutegiko lasterketa garrantzitsuenetako batean. Ruiz de Arcauteren etapa garaipenak, Olaberen zazpigarren postuak eta taldeak une erabakigarrietan izan duen presentziak argi erakusten dute lau egunetan egindako lana. Talde-lan horretan ezinbesteko ekarpena egin dute, halaber, Aratz Unanuek eta Mattin Salegik. Emaitza nabarmenen bila aritu diren taldekideei babesa emanez eta etapa bakoitzean euren lana eginez, taldearen errendimenduan funtsezko zeregina bete dute.
