Smartlog Nesteko txirrindulariak 23 urtez azpikoen Bizkaiko txapelketa irabazi du kategorian egin duen lehen urtean, eta taldeak beste behin ere jarrera erasokorra erakutsi du Gernikako lasterketan.
Josu Odriozola 23 urtez azpikoen Bizkaiko txapeldun berria da, astelehen honetan Gernikako lasterketan lortutako emaitzari esker. Smartlog Nesteko txirrindulariak kategorian egin duen lehen urtean bilakatu da txapeldun. Gainera, Gabriel Ibañezek tarteko helmugak irabazi zituen, Jon Conejero zortzigarren izan zen eta taldeak eguneko mugimendu nagusietan presentzia izan lasterketan.
Mugimenduak izan ziren nagusi
Lasterketa hasieratik, Adur Arrizabalaga eta Gabriel Ibañez euren aukeren bila aritu ziren ihesaldian, eta gainerako taldekideak adi izan ziren tropel barruan sortzen ziren mugimenduei. Bizkaiko Balkoiko lehen igoeran, lasterketa hautatzen hasi zen, eta Aimar Erostarbe eta Odriozola, besteak beste, mugimendu ezberdinetan presente egon ziren.
Bigarren igoerak lasterketa are gehiago hautatu zuen. Lau txirrindulariko talde bat aurretik joan zen garaipena jokatzeko, eta atzetik talde nagusia iritsi zen, Jon Conejero (8.), Ethan Cabanillas (13.) eta Josu Odriozola (17.) tartean zirela.
Emaitza horri esker, Odriozola Bizkaiko 23 urtez azpikoen txapeldun berria bilakatu da, Smartlog Nesten denboraldi onari beste aipamen berezi bat gehituz.
Bestalde, Ibañezek ere jardunaldi bikaina osatu zuen, tarteko helmugak irabazita, eguneko ihesaldian ere parte hartu ondoren.
Odriozolaren balorazioa
Smartlog Nesteko bizkaitarrak honela baloratu zuen bere jarduna eta taldeak egindako lana: “Oso pozik nago, batez ere txapelketa hau nire lehen urtean irabazteagatik. Lasterketa oso mugitu izan da, eta uneoro adi egon gara. Taldeak lan handia egin du, eta lasterketan presente egoten saiatu gara, gure aukeren bila. Azkenean, ezin izan dugu garaipenaren lehian egon, baina lorpen hau egiten ari garen lanaren sari polita da. Orain lanean jarraitzea eta une hau aprobetxatzea dagokigu, hazten jarraitzeko”.
Gernikako lasterketak Smartlog Nesten jarrera erasokorra berretsi zuen, taldea lehen kilometroetatik bere aukeren bila aritu baitzen eta lasterketa hautatzen joan ziren mugimendu ezberdinetan presente egon baitzen.
